“Xubinkii taranka ee tirxiga ka soo daatay” Qiso xanuun badan "Khaatumo Xumida"

Assalaamu Caleykum Waraxmatullahi Wabarakaatuhu, walaalayaal waa markale iyo barnaamijyada taxanaha qisooyinka mudan in lagu cibra qaatto, maanta mowduuca aan ka hadleyno waa mid xasaasi ah oo aan inaba leyska indha tiri Karin, inagoo ilaahay ka baryeyno inuu ku cibra qaatto qof walboo dareensan inuu wehsi ku jiro.

“Xubintii taranka ee tirxiga ka soo daatay”

Waa qiso aad u xanuun badan oo ku dhacday wiil muslim ah oo aad taqi u ahaa balse markii dambe ku dhintay khaatumo xumo aad u xanuun badan, waxaana qof walboo aqriyo dareemaa cabsi iyo wer-wer.

Wiilkan wuxuu la socday doon ganacsi oo ka timid mid ka mid ah wadamada khaliijka carabta kuna socotay badweynta Hindiya, markii ay doonto meel dhexe sii mareyso waxay ku hakataa jazeerad yar oo ka tirsan wadamadii leysku oran jiray Hindiyadii ballaarneyd.

Dadka doonta saaran oo u badan ganacsato ayaa waxaa ku jira qaar jaziiraddan ugu soo qasda sino iyo faaxishaad ay kula kacaan dumar jirkooda ka ganacsada oo deggan halkan.

Sida caadiga ah maalintii waxaa qof walbo galaa magaalada iyagoo qof walbaa uu soo qabsado howl u gaar ah ganacsigiisa, halka dhanka kale uu jiro wiil dhallinyaro ah oo doonta ka ah imam iyo mu’adin.

Markay dadku ku mashquulaan howshooda aduunyo wuxuu doonida ku dul aqristaa quraanka kariimka, isagoo xilliyada salaadda dadka tukiya, wuxuuna ahaa qof aad u kheyr badan.

Inkastoo raawiga qisadan uusan faah-faahin buuxda ka bixin magaca wiilkan, balse qasadkeennu waa qisada, waxaana maalin maalmaha ka mid ah wiilkii yaraa u yimid nin ka mid ah kuwa fuxshiga u yimaada jaziiradda.

Wuxuu ninkii wiilka yar ku yiri “Wiilyahow waa adiga habeen iyo maalin doonida dul saarane maad soo degtid oo aragtid waxa ka jira caalamkan aan joogno”….wuxuu sii raaciyay 

“Aniga kuma dhahayo aan ku geeyo goobaha lagu tunto ama lagu caweeyo laakiin waxaan ku dhihi lahaa maad soo aragtid kuwa masaamiirta laqaya, dabka qur-quriya indha sercaadkana ku dheereeya”

Wiilkii baa yaabay oo yiri “oo waxaasoo dhan ma adduunkan bay ka jiraan..?”

Faasiqii baa ku jawaabay “Haa ee na keen”.

Wiilkii ahlu kheyrka ahaa wuxuu si’ hal haleel ah u raacay ninkii fasahaadda waday, wixii la socdaba waxaa albaabka laga istaagay guri yar oo cariish ah, ninkii baa wiilka yar ka codsaday inuu xoogaa yar dibadda ku sugo, uusan ka soo dhawaan guriga.

Waxyar uun kadib waxaa dhegaha wiilkii ku soo dhacay qosol aan fiicneyn nux-nux, wuxuu is-celiyaba wuxuu u soo dhawaaday gurigii looga digay, durba waxaa ka hor muuqata {Naag xishoodkii iyo dherkiiba ka qatan}.

Wiilkii baa yaabay oo ku sii dhawaaday cariishka wuxuuna ka eegay duleel yar, wuxuu durba arkay wuxuusan waligiis arkin.

“Halkaas ayuuna ku haleelay gamuunkii sheydaanka”.

Waxyar kadib ninkii baa soo baxay oo wiilkii u kaxeeyay doonidii, habeenkii oo dhan wiilka yar muusan gam’in wuxuu hadba xasuustaa wixii uu arkay.

Illeen gamuun sheydaan baa wiilka helay qeyb ka mid ah qalbigiisana gacan ku heynta ayaa lala wareegay, markuu waagu baryey qofkii ugu horreeyay ee doonta ka dega ee magaalada gala waxaa noqday wiilkii oo siduu u socday galay gurigii fisqiga.

Maalintii koowaad, maalintii labaad iyo maalintii 3-aad aqalkii cariishka ahaa kama uusan soo bixin oo fasahaadda ayuu dhankiisa ka waday, ilaa markii dambe dadkii doontu dareemaan oo yiraahdaan “Aaway mu’adimkeennii..Aaway imaamkeennii…”

Markii dambe wuxuu naaquudihii doonida amray in wiilka la soo raadiyo, waxaana loogu tagay isagoo howshii xumeyd ku guda jira, laakiin waxaa laga soo bixin waayay aqalkii.

Mar 1-aad, mar 2-aad iyo mar 3-aadba way ku guul dareesteen in wiilkan yar ay keenaan doonida oo ay ka soo saaraan guriga, wuxuuna codsaday in laga tago oo aanu laaban.

Naaquudihii doonta ayaa ka baqay hadii ay ka tagaan wiilka in reerkiisu qabsadaan, wuxuuna ragii goobta ugu xoog weynaa ku amray inay xoog ku soo wadaan.

Wiilkii yarka ahaa maba ahan ninkii ahlu kheyrka ahaa ee imaamka iyo mu’adimka umadda ahaa ee wuxuu isku riixay gees shishe oo doonida ka tirsan wuxuuna ka bixi waayay oohin cajiib ah ilaa dadku ka baqaan inuu oohintaas u dhinto.

Wiilkii af-ma qaban ilaa mid ka mid ah rakaabkii ku yiraahdo “War wiil yahow maxaa kugu dhacay..nin fiican baad aheyde, sidee wax kaa yihiin..?..”

Wiilkii baa ku hadal gaabiyay “Iga aamus waxa igu dhacay ma ogide”

Waa cajiib iyo amakaag waxa wiilka ku dhacay, ninkiibaa isagoo yaaban ku yiri war heedhe balaayan ha qarsane maxaa ku helay?

Wiilkii baa feyday xubinkiisii taranka misna waxaaba ka daadanaya tirxi, wanacuudu billaahi.

Ninkii baa yiri “Ilaahow balaayadan baan kaa magan galay”

Goor habeen bar ay tahay baa dadkii rakaabka ahaa waxay maqleen qeyli arga-gax leh, markey yimaadeen goobtii wax ka qeyliyeen waxaaba meyd ah wiilkii yaraa oo afka ku qaniishan doonta.

INNAA LILLAAHI WA INNAA ILEYHI RAAJICUUN.

Qore: Abdishakur Hussein Shakra
Wariyeshakra@gmail.com 
Facebook.com/diintaislaamka

FG: Walaal ku soo biir Faafinta Diinta Islaamka
 
FAAFI.BLOGSPOT.COM

Share on Google Plus

Qoraaga: Unknown

Magaceygu waa Abdishakur Hussein Mohamed loo yaqaan (Shakra), waxaan ku noolahay Magaalada Muqdisho ee caasimadda dalka Somalia, waxaan jecleystay inaan xirfadeyda wariyenimo ku kaabo faafinta Diinta Islaamka. Hadii aad tahay qof jecel diinteenna xaniifka ah ee Islaamka fadlan hadda is weydii maxaad u qabatay diinteenna oo loo daadiyay dhiiggii qaaliga ahaa ee Nabi Mohamed SCW, diinta aan u istaagay inaan ka shaqeeyo waxaa u dhintay boqollaal geesiyaal muslimiin ah AHUN. FG: Hadii aad kheyr qabe tahay ogow inuu jiro walaal kale oo madow kaga jiro Diinta Islaamka oo laga yaabo inuu saaladaha wahsado ama aanan soomin.